RCB vs MI: அதிரடி ஓப்பனர் படிக்கல் விளையாடாதது ஏன்?

மும்பைக்கு எதிரான முதல் ஐபிஎல் போட்டியில் பெங்களூர் அணி வீரர் தேவ்தத் படிக்கல் பங்கேற்கவில்லை. அவருக்கு என்ன ஆச்சு?

rcb

ஐபிஎல் 14ஆவது சீசனில் முதல் ஆட்டத்தில் நடப்பு சான்பியன் மும்பை இந்தியன்ஸ் அணியும் ராயல் சேலஞ்சர்ஸ் பெங்களூர் அணியும் நேற்று (ஏப்ரல் 9) சென்னை சேப்பாக்கம் மைதானத்தில் விளையாடின. இப்போட்டியில் விராட் கோலி தலைமையிலான பெங்களூர் அணி ரோஹித் ஷர்மா தலைமையிலான மும்பை அணியை 2 விக்கெட் வித்தியாசத்தில் வெற்றி பெற்றது. கடைசிப் பந்து வரை சென்ற இப்போட்டியில் த்ரில் வெற்றி பெற்ற பெங்களூர் அணியில் வழக்கம்போல டிவில்லியர்ஸ் பொறுப்புடனும் அதிரடியாகவும் விளையாடி வெற்றிக்கு முக்கியப் பங்களித்தார். அணியில் புதிதாக இணைந்துள்ள கிளென் மேக்ஸ்வெல்லும் அதிரடி காட்டினார்.

இப்போட்டியில் பெங்களூர் அணியின் துவக்க ஆட்டக்காரராக கேப்டன் விராட் கோலியுடன் வந்த மற்றொரு ஆட்டக்காரர் வாஷிங்டன் சுந்தர். அவர் ஓப்பனிங் இறங்கியது பலருக்கும் ஆச்சரியத்தையும் அதிர்ச்சியையும் ஏற்படுத்தியது. ஏனெனில், கடந்த ஐபிஎல் சீசனில் துவக்க வீரராகக் களமிறங்கி அதிரடி காட்டிய தேவ்தத் படிக்கல் எங்கே என்ற மிகப் பெரிய கேள்வி ரசிகர்கள் மத்தியில் இருந்தது. சென்ற சீசனில்தான் தேவ்தத் படிக்கல் முதன்முதலாக ஐபிஎல் தொடரில் பங்கேற்றார். ஆனால் தொடர் முழுவதும் சிறப்பாக விளையாடி, 473 ரன்கள் குவித்ததோடு, பெங்களூர் அணியின் அதிக ரன் குவித்த வீரராகவும் திகழ்ந்து அனைவரது கவனத்தையும் ஈர்த்தார்.

MI: 9 வருடங்களாக தொடரும் மும்பை அணியின் மோசமான சாதனை!
இந்த ஆண்டின் ஐபிஎல் தொடரிலும் அவர் கலக்குவார் என்று எதிர்பார்க்கப்பட்ட நிலையில், முதல் போட்டியிலேயே அவர் களமிறங்கவில்லை. காரணம் என்னவென்றால், அவரும் மற்றொரு பெங்களூர் அணி வீரர் டேனியல் சாம்ஸும் கொரோனா பரிசோதனைக்கு உட்படுத்தப்பட்டதால் ஓய்வளிக்கப்பட்டதாக அணி நிர்வாகம் கூறியுள்ளது. கொரோனா பரிசோதனையில் தேவ்தத் படிக்கலுக்கு கொரோனா இல்லை என்பது உறுதிசெய்யப்பட்டுவிட்டது. ஆனாலும், பாதுகாப்பு காரணங்கள் கருதி நேற்றைய போட்டியில் படிக்கலுக்கு ஓய்வளிக்கப்பட்டுள்ளது.

ஏப்ரல் 14ஆம் தேதி ஹைதராபாத் அணிக்கு எதிரான போட்டியில் தேவ்தத் படிக்கல் நிச்சயமாகக் களமிறங்குவார் என்று கேப்டன் விராட் கோலி உறுதிசெய்துள்ளார். அன்று அவரது அதிரடி துவக்கத்தைக் காண ரசிகர்கள் ஆவலுடன் காத்திருக்கின்றனர்.

Tamil News App: உடனுக்குடன் உலக நிகழ்வுகளை உங்களது சமயம் தமிழ் ஆப்பில் நொடியில் பார்க்கலாம்

முக்கியச் செய்திகள் மற்றும் புதிய செய்திகளுக்கு Samayam Tamil ஃபேஸ்புக் பக்கத்துடன் தொடர்ந்திருங்கள்